ന്യൂഡൽഹി: ബോംബ് ഭീഷണിയെ തുടർന്ന് എയർ ഇന്ത്യ വിമാനം അടിയന്തരമായി നിലത്തിറക്കി. ലണ്ടനിൽ നിന്ന് ഡൽഹിയിലേയ്ക്ക് വന്ന എയർ ഇന്ത്യ (എഐസി 114) വിമാനം ആണ് ബോംബ് ഭീഷണിയെ തുടർന്ന് റിയാദിൽ ഇറക്കിയത്. വിമാനത്തിൽ ബോംബ് വച്ചിട്ടുണ്ട് എന്ന് ടിഷ്യു പേപ്പറിൽ എഴുതിയ സന്ദേശം ശുചിമുറിയിൽ നിന്ന് ലഭിച്ചതിനെ തുടർന്ന് ആണ് വിമാനം അടിയന്തരമായി റിയാദിൽ ഇറക്കിയത്.

ബാഗുകൾ എടുക്കാൻ അനുവദിക്കാതെ യാത്രക്കാരെ വിമാനത്താവളത്തിന്റെ ഒരു ഭാഗത്തേക്ക് മാറ്റി. പരിശോധനകൾക്ക് ശേഷം ടെർമിനലിലേക്ക് കൊണ്ടുവന്നു. ഇന്ത്യൻ സമയം രാവിലെ 11 മണിക്ക് വിമാനത്തിലെ പരിശോധനകൾ മൂന്നര മണിക്കൂർ പിന്നിട്ടു. പരിശോധനകൾക്കുശേഷം എത്രയും വേഗം വിമാനം പുറപ്പെടും എന്ന് യാത്രക്കാരെ വിമാനത്താവള അധികൃതർ അറിയിച്ചു.