പ്രതീകാത്മക ചിത്രം
പത്തനംതിട്ട : റാന്നിയില് യുവാവ് കാറിടിച്ച് മരിച്ച സംഭവം കൊലപാതകമെന്ന് പോലീസ്. റാന്നി സ്വദേശി അമ്പാടിയുടെ മരണമാണ് കൊലപാതകമാണെന്ന് പോലീസ് പറയുന്നത്. കഴിഞ്ഞ ദിവസം രാത്രി 9.30 ഓടെയാണ് അമ്പാടിയെ കാറിടിക്കുന്നത്.
റോഡപകടത്തില് കൊല്ലപ്പെട്ടു എന്ന രീതിയിലാണ് ആദ്യം പോലീസ് ഇതിനെ സമീപിച്ചത്. എന്നാല് പിന്നീടാണ് സംഭവത്തിന് പിന്നില് ഗൂഢാലോചനയുണ്ടെന്നും കൊലപാതകമാണെന്നും സംശയുണ്ടായത്. വിശദമായ അന്വേഷണത്തില് അമ്പാടിയെ കാറിടിച്ച് കൊലപ്പെടുത്തിയതാണെന്ന് കണ്ടെത്തി.
ഇന്നലെ രാത്രി 9.30-ന് മന്ദമരുതിലാണ് റോഡ് മുറിച്ച് കടക്കവേ വാഹനമിടിച്ച് അമ്പാടിക്ക് ഗുരുതരമായി പരിക്കേറ്റത്. കാര് നിര്ത്താതെ പോകുകയും ചെയ്തു. തുടര്ന്ന് പ്രദേശവാസികള് കോഴഞ്ചേരിയിലെ സ്വകാര്യ ആശുപത്രിയില് പ്രവേശിച്ചു. അത്യാഹിതവിഭാഗത്തില് ചികിത്സയിലായിരുന്ന ഇയാള് അര്ധരാത്രിയോടെ മരണമടഞ്ഞു.
സാധാരണ അപകടമരണം എന്ന രീതിയിലാണ് റാന്നി പോലീസ് എഫ്ഐആര് രജിസ്റ്റര് ചെയ്തത്. എന്നാല് രാത്രി വൈകി പോലീസിന് ലഭിച്ച രഹസ്യവിവരത്തേ തുടര്ന്നുള്ള അന്വേഷണത്തിലാണ് അപകടം മരണമല്ല, കൊലപാതകമാണ് എന്ന് വ്യക്തമാക്കുന്ന നിര്ണായക വിവരങ്ങള് ലഭിച്ചത്.
ഇന്നലെ ഉച്ചയോടെ റാന്നി ബിവറേജസ് ചില്ലറ വില്പ്പനശാലയിലുണ്ടായ തര്ക്കം കൊലപാതകത്തില് കലാശിച്ചുവെന്നാണ് വിവരം. ഇടിച്ചശേഷം കടന്നുകളഞ്ഞ കാര് രാത്രി തന്നെ പോലീസ് കസ്റ്റഡിയില് എടുത്തു. റാന്നി സ്വദേശികളായ മൂന്ന് പേരാണ് സംഭവത്തിന് പിന്നിലെന്നാണ് പോലീസ് സംശയിക്കുന്നത്. ഇവര് ഒളിവിലാണെന്നാണ് വിവരം. ഇവരുടെ പേരുകള് പോലീസ് പുറത്തുവിട്ടിട്ടില്ല.
Jeevan TV 