എ.കെ. സുരേഷ്
പാലക്കാട് : ഉപതിരഞ്ഞെടുപ്പ് അടുക്കവെ പാലക്കാട് കോണ്ഗ്രസിന് വീണ്ടും തിരിച്ചടി. പിരായിരി പഞ്ചായത്തിലെ കോണ്ഗ്രസ് നേതാവ് കെ.എ. സുരേഷ് പാര്ട്ടി വിട്ടു. ഷാഫി പറമ്പിലിന്റെ ഏകാധിപത്യ നിലപാടുകളില് പ്രതിഷേധിച്ചാണ് പാര്ട്ടി വിടുന്നതെന്ന് പറഞ്ഞ സുരേഷ് സി.പി.എമ്മില് ചേര്ന്നു. ഇടത് സ്വതന്ത്ര സ്ഥാനാര്ഥി പി. സരിനെ വിജയിപ്പിക്കാനായി പ്രവര്ത്തിക്കുമെന്നും അദ്ദേഹം മാധ്യമങ്ങളോട് പറഞ്ഞു.
‘പിരായിരി പഞ്ചായത്തില് ഷാഫിയുടെ ഗ്രൂപ്പ് കളിയാണ് നടക്കുന്നത്. ഇക്കാര്യം നേതൃത്വത്തെ അറിയിച്ചിട്ടും നടപടിയുണ്ടായില്ല. ഷാഫിയോടുള്ള വിരോധം കൊണ്ടാണ് പാര്ട്ടി വിടുന്നത്. നേതാക്കളാരും ഇതുവരെ വിളിച്ചിട്ടില്ല. എന്നെ പോലെ നിരവധി പേര് ഉണ്ട്. സി.പി.എമ്മില് ചേര്ന്നുകഴിഞ്ഞു. സരിനെ ജയിപ്പിക്കാനായി പ്രവര്ത്തിക്കും,’ സുരേഷ് മാധ്യമങ്ങളോട് പറഞ്ഞു.
യു.ഡി.എഫിന് വലിയ സ്വാധീനമുള്ള പഞ്ചായത്താണ് പിരായിരി. പഞ്ചായത്തിലെ 21 വാര്ഡുകളിലും ഷാഫിക്കെതിരെ പടയൊരുക്കം നടക്കുന്നുവെന്ന സൂചനയും സുരേഷിന്റെ വാക്കുകളിലുണ്ട്. ദളിത് കോണ്ഗ്രസിന്റെ മണ്ഡലം പ്രസിഡന്റായിരുന്നു സുരേഷ്. ഉപതിരഞ്ഞെടുപ്പിന്റെ ഭാഗമായി പാലക്കാട്ടെ കോണ്ഗ്രസില് വലിയ അമര്ഷവും പൊട്ടിത്തെറിയുമാണ് ഉള്ളതെന്ന് സി.പി.എം. പാലക്കാട് ജില്ലാ സെക്രട്ടറി എം. സുരേഷ് ബാബു പറഞ്ഞു.
സാധാരണ കോണ്ഗ്രസുകാര്ക്ക് അവിടെ നില്ക്കാന് കഴിയാത്ത സാഹചര്യമാണെന്നും അദ്ദേഹം പറഞ്ഞു. പിരായിരി പഞ്ചായത്തംഗം സിതാര ശശിയും ഭര്ത്താവും കോണ്ഗ്രസ് മണ്ഡലം സെക്രട്ടറിയുമായ ജി. ശശി എന്നിവരും കഴിഞ്ഞദിവസം പാലക്കാട്ടെ കോണ്ഗ്രസില് കലാപക്കൊടി ഉയര്ത്തിയിരുന്നു. ഉപതിരഞ്ഞെടുപ്പില് ഇടത് സ്വതന്ത്ര സ്ഥാനാര്ഥി ഡോ. പി. സരിനെ പിന്തുണയ്ക്കുമെന്നാണ് ഇരുവരും മാധ്യമങ്ങളോട് പറഞ്ഞത്.
ഷാഫി പറമ്പില് ഏകാധിപതിയാണെന്നും എം.എല്.എ. ആയശേഷം ഈ പ്രദേശത്തിന് വികസനഫണ്ട് തരുന്നില്ലെന്നും ഇവര് ആരോപിച്ചു. വേണ്ടപ്പെട്ടവര്ക്കുമാത്രമാണ് ഫണ്ട് നല്കുന്നത്. പഞ്ചായത്തംഗത്വം രാജിവെക്കില്ലെന്നും സിതാര ശശി പറഞ്ഞു. കോണ്ഗ്രസ് ഭരണത്തിലുള്ള പിരായിരി ഗ്രാമപ്പഞ്ചായത്തിലെ ഒന്നാംവാര്ഡ് അംഗമാണ് സിതാര.
Jeevan TV 