പ്രതീകാത്മക ചിത്രം

പത്തനംതിട്ട : കഴിഞ്ഞയിടെ സി.പി.എമ്മിൽ ചേർത്ത കാപ്പാ കേസ് പ്രതി ഡി.വൈ.എഫ്‌.ഐ പ്രവർത്തകന്റെ തല ബിയർകുപ്പികൊണ്ട് അടിച്ചുപൊട്ടിച്ചു. മുണ്ടുകോട്ടയ്ക്കൽ സ്വദേശി എസ്.രാജേഷിനാണ് അടികിട്ടിയത്. ഇയാൾ നൽകിയ പരാതിപ്രകാരം ശരൺ ചന്ദ്രനെതിരേ പത്തനംതിട്ട പോലീസ് കേസെടുത്തു.

കഴിഞ്ഞമാസം 29-ന് രാത്രി മൈലാടുംപാറയിൽ ശരൺ കുപ്പികൊണ്ട് അടിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്‌തെന്നാണ് പരാതിയിലുള്ളത്. അടുത്തിടെയാണ് മന്ത്രി വീണാ ജോർജിന്റെയും സി.പി.എം. ജില്ലാ സെക്രട്ടറി ഉദയഭാനുവിന്റെയും സാന്നിധ്യത്തിൽ ശരണും 30-ഓളംപേരും പാർട്ടിയിൽ ചേർന്നത്.

കാപ്പാ കേസിൽ ഉൾപ്പെട്ട ഇയാൾക്ക് അംഗത്വം കൊടുത്തത് വിവാദമായിരുന്നു. ഇതിനിടെയാണ് കാപ്പാ എന്നെഴുതി കേക്ക് മുറിച്ച് ശരണും കൂട്ടാളികളും പിറന്നാൾ ആഘോഷം നടത്തിയത്. പോലീസ് ഇതിനും കേസെടുത്തിട്ടുണ്ട്.