കൊലപാതകം നടന്ന കെട്ടിടത്തിൽ പോലീസ് പരിശോധന നടത്തുന്നു
കൊച്ചി: പെരുമ്പാവൂരില് അതിഥിത്തൊഴിലാളിയെ കുത്തിക്കൊലപ്പെടുത്തി. ഒഡിഷ സ്വദേശിയായ ആകാശ് ഡിഗല് ആണ് കൊല്ലപ്പെട്ടത്. സംഭവത്തില് പ്രതിയായ ഒഡിഷ സ്വദേശി അഞ്ജന് നായിക്ക് കൃത്യത്തിന് പിന്നാലെ രക്ഷപ്പെട്ടു. ഇയാള്ക്കായി തിരച്ചില് ആരംഭിച്ചതായി പോലീസ് പറഞ്ഞു.
ചൊവ്വാഴ്ച രാവിലെ പെരുമ്പാവൂര് വടക്കാട്ടുപടിയിലായിരുന്നു സംഭവം. വടക്കാട്ടുപടിയിലെ വാടക കെട്ടിടത്തിലാണ് കൊല്ലപ്പെട്ട ആകാശും പ്രതി അഞ്ജനും താമസിച്ചിരുന്നത്. ആകാശിനൊപ്പം കുടുംബവും ഇവിടെ താമസമുണ്ട്. ചൊവ്വാഴ്ച രാവിലെ ആകാശും അഞ്ജനും തമ്മില് വാക്കുതര്ക്കമുണ്ടായെന്നും ഇതാണ് കത്തിക്കുത്തില് കലാശിച്ചതെന്നുമാണ് പ്രാഥമികവിവരം.
ഗുരുതരമായി പരിക്കേറ്റ ആകാശിനെ ഉടന്തന്നെ പെരുമ്പാവൂര് താലൂക്ക് ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. അതേസമയം, പ്രതിയായ അഞ്ജന് കൊലപാതകത്തിന് പിന്നാലെ സ്ഥലത്തുനിന്ന് കടന്നുകളഞ്ഞു. ഇയാള്ക്കായി പോലീസ് അന്വേഷണം തുടരുകയാണ്.
Jeevan TV 