Photo: Porsche India

ജര്‍മന്‍ ആഡംബര സ്‌പോര്‍ട്‌സ് കാര്‍ നിര്‍മാതാക്കളായ പോര്‍ഷെ അടുത്തിടെ ആഗോള വിപണിയില്‍ അവതരിപ്പിച്ച 911 മോഡലുകളുടെ ബുക്കിങ്ങ് ഇന്ത്യയിലും ആരംഭിച്ചു. പോര്‍ഷെ 911 കരേര, കരേര 4 ജി.ടി.എസ്. എന്നീ രണ്ട് വേരിയന്റുകളില്‍ എത്തുന്ന ഈ ആഡംബര മോഡലുകള്‍ക്ക് യഥാക്രമം 1.99 കോടി രൂപയും 2.75 കോടി രൂപയുമാണ് എക്‌സ്‌ഷോറൂം വില. പുതിയ കരേര മോഡലിന് മുന്‍ മോഡലിനെക്കാള്‍ 13 ലക്ഷം രൂപ വില ഉയര്‍ത്തിയിട്ടുണ്ടെങ്കിലും ജി.ടി.എസ് പതിപ്പില്‍ കാര്യമായ വര്‍ധനവ് വരുത്തിയിട്ടില്ല.

പുതിയ 911 കരേര മോഡല്‍ 3.0 ലിറ്റര്‍ ട്വിന്‍ ടര്‍ബോ ബോക്‌സര്‍ എന്‍ജിനാണ് കരുത്തേകുന്നത്. ഇത് 394 ബി.എച്ച്.പി. പവറും 450 എന്‍.എം. ടോര്‍ക്കുമാണ് ഉത്പാദിപ്പിക്കുന്നത്. റിയര്‍ വീല്‍ ഡ്രൈവ് മോഡലായ ഈ വാഹനത്തില്‍ എട്ട് സ്പീഡ് പി.ഡി.കെ ഓട്ടോമാറ്റിക് ഗിയര്‍ബോക്‌സാണ് ട്രാന്‍സ്മിഷന്‍ ഒരുക്കുന്നത്. പോര്‍ഷെയും ആക്ടീവ് സസ്‌പെന്‍ഷന്‍ മാനേജ്‌മെന്റ് സംവിധാനത്തോടെയാണ് മുഖംമിനിക്കിയിട്ടുള്ള 911 കരേര വിപണിയില്‍ എത്തിക്കുന്നത്.

മാട്രിക്‌സ് എല്‍.ഇ.ഡി. ഹെഡ്‌ലാമ്പ്, മുന്നില്‍ 19 ഇഞ്ചും പിന്നില്‍ 20 ഇഞ്ചും വലിപ്പത്തില്‍ നല്‍കിയിട്ടുള്ള വീലുകള്‍, സിക്‌സ്-പിസ്റ്റണ്‍ അലുമിനിയം മോണോബ്ലോക്ക് ഫിക്‌സഡ് ബ്രേക്ക് കാലിപ്പര്‍ മുന്നിലും ഫോര്‍ പിസ്റ്റണ്‍ അലുമിനിയം മോണോബ്ലോക്ക് ഫിക്‌സഡ് ബ്രേക്ക് കാലിപ്പര്‍ പിന്നിലും നല്‍കിയാണ് ഇത്തവണ എത്തിയിട്ടുള്ളത്. ഇലക്ട്രിക് സണ്‍റൂഫ്, ടൂ സോണ്‍ ഓട്ടോമാറ്റിക് ക്ലൈമറ്റ് കണ്‍ട്രോള്‍, നാല് രീതിയില്‍ അഡ്ജസ്റ്റ് ചെയ്യാന്‍ കഴിയുന്നതും ഹീറ്റഡ് ഫങ്ഷന്‍ ഉള്ളതുമായ സ്‌പോര്‍ട്‌സ് സീറ്റ് എന്നിവയും 911 കരേരയുടെ സവിശേഷതകളാണ്.

പുതിയ ടി-ഹൈബ്രിഡ് പവര്‍ട്രെയിനില്‍ എത്തിയിതാണ് കരേര 4 ജി.ടി.എസിന്റെ പ്രധാന സവിശേഷത. ഇലക്ട്രിക് ടര്‍ബോചാര്‍ജര്‍ സംവിധാനത്തിലുള്ള 3.6 ലിറ്റര്‍ ആറ് സിലിണ്ടര്‍ എന്‍ജിനാണ് ഈ മോഡലില്‍ കരുത്തേകുന്നത്. 541 ബി.എച്ച്.പി. പവറും 610 എന്‍.എം. ടോര്‍ക്കുമാണ് ഈ എന്‍ജിന്‍ ഉത്പാദിപ്പിക്കുന്നത്. എട്ട് സ്പീഡ് പി.ഡി.കെ.ഓട്ടോമാറ്റിക് ഗിയര്‍ബോക്‌സാണ് ഈ മോഡലിലും ട്രാന്‍സ്മിഷന്‍ നിര്‍വഹിക്കുന്നത്. ഓള്‍ വീല്‍ ഡ്രൈവ് സംവിധാനവും ഇതില്‍ ഒരുക്കുന്നുണ്ട്.

അനലോഗ് ആന്‍ഡ് ഡിജിറ്റല്‍ സ്‌റ്റോപ്പ്‌വാച്ച്, സ്‌പോര്‍ട്ട് ക്രോണോ ക്ലോക്ക്, ബ്ലാക്ക് ഷിഫ്റ്റ് പാഡില്‍, സ്‌പോര്‍ട്ട് പ്ലസ് മോഡ്, പി.എസ്.എം. സ്പോർട്സ് മോഡ്, പോര്‍ഷെ ട്രാക്ക് പ്രിസിഷന്‍ ആപ്പ്, ടയര്‍ ടെംപറേച്ചര്‍ ഡിസ്‌പ്ലേ തുടങ്ങിയ ഫീച്ചറുകളുള്ള സ്‌പോര്‍ട്ട് ക്രോണോ പാക്കേജ് ഈ വാഹനത്തില്‍ നല്‍കിയിട്ടുണ്ട്. ജി.ടി. സ്‌പോര്‍ട്‌സ് സ്റ്റിയറിങ്ങ് വീല്‍, സ്‌പോര്‍ട്‌സ് എക്‌സ്‌ഹോസ്റ്റ് സിസ്റ്റം, ജി.ടി.എസ്. ലോഗോ ഹെഡ്‌റെസ്റ്റ്, ബ്ലാക്ക് എക്‌സ്‌റ്റേണല്‍ ലോഗോ, ആന്ത്രാസൈറ്റ് ഗ്രേ വീലുകള്‍ എന്നിവയും ഈ വേരിയന്റിന്റെ സവിശേഷതകളാണ്.