ടൊയോട്ട ഇന്നോവ ഹൈക്രോസ് | Photo: Toyota Bharat

ടി.എന്‍.ജി.എ. 2.0 ലിറ്റര്‍ നാല് സിലിണ്ടര്‍ വി.വി.ടി.ഐ. പെട്രോള്‍ എന്‍ജിനാണ് ഹൈക്രോസിന്റെ ജി.എക്‌സ്.(ഒ) വേരിയന്റിലും പ്രവര്‍ത്തിക്കുന്നത്.

ഇന്ത്യയിലെ എം.പി.വി. ശ്രേണിയില്‍ ഇന്നോവയ്ക്ക് മുകളില്‍ ഒരു വാഹനം ഇതുവരെ എത്തിയിട്ടില്ലെന്ന് പറയാം. ഇന്നോവയായും ക്രിസ്റ്റയായും ജനപ്രീതി സമ്പാദിച്ച ഈ വാഹനം ഒടുവില്‍ ഹൈക്രോസ് ആയപ്പോഴും സെഗ്മെന്റ് ലീഡറായി തുടരുകയാണ്. ബുക്കിങ്ങില്‍ ഉള്‍പ്പെടെ ലഭിച്ചിട്ടുള്ള സ്വീകാര്യതയുടെ പശ്ചാത്തലത്തില്‍ ഹൈക്രോസ് എം.പി.വിയുടെ പുതിയ ഒരു വേരിയന്റ് കൂടി അവതരിപ്പിച്ചിരിക്കുകയാണ് നിര്‍മാതാക്കളായ ടൊയോട്ട.

ഹൈക്രോസ് ജി.എക്‌സ്(ഒ) എന്ന വേരിയന്റാണ് പുതുതായി എത്തിയിരിക്കുന്നത്. നോണ്‍ ഹൈബ്രിഡ് പതിപ്പായായാണ് ഈ വകഭേദം എത്തിയിരിക്കുന്നത്. ഹൈക്രോസ് പെട്രോള്‍ ലൈനപ്പിലെ ഏറ്റവും ഉയര്‍ന്ന വകഭേദവും ഈ വേരിയന്റ് ആയിരിക്കുമെന്നാണ് വിലയിരുത്തലുകള്‍. എന്നാല്‍, ഈ വാഹനത്തിന്റെ വില സംബന്ധിച്ച വിവരങ്ങള്‍ ടൊയോട്ട ഇതുവരെ പുറത്തുവിട്ടിട്ടില്ല. ഏകദേശം 21 ലക്ഷം രൂപയോളം വിലയാകുമെന്നാണ് വിലയിരുത്തലുകള്‍.

എല്‍.ഇ.ഡി. ഫോഗ്‌ലാമ്പ്, റിയര്‍ വിന്‍ഡോ ഡിമിസ്റ്റര്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍, ഡ്യുവല്‍ ടോണ്‍ സീറ്റുകള്‍, സോഫ്റ്റ്ടച്ച് ഡാഷ്‌ബോര്‍ഡ്, 10.1 ഇഞ്ച് വലിപ്പത്തില്‍ ആന്‍ഡ്രോയിഡ് ഓട്ടോ-ആപ്പിള്‍ കാര്‍പ്ലേ സംവിധാനത്തില്‍ ഒരുങ്ങിയിട്ടുള്ള ഇന്‍ഫോടെയ്ന്‍മെന്റ് സിസ്റ്റം, ഏഴ്-എട്ട് സീറ്റിങ്ങ് ഓപ്ഷനുകൾ, റിയര്‍ സണ്‍ഷേഡ്, 360 ഡിഗ്രി ക്യാമറ, പാര്‍ക്കിങ്ങ് സെന്‍സറുകള്‍ തുടങ്ങിയവയാണ് ഈ വാഹനത്തില്‍ കൊണ്ടുവന്നിട്ടുള്ള ഫീച്ചറുകള്‍.

ടി.എന്‍.ജി.എ. 2.0 ലിറ്റര്‍ നാല് സിലിണ്ടര്‍ വി.വി.ടി.ഐ. പെട്രോള്‍ എന്‍ജിനാണ് ഹൈക്രോസിന്റെ ജി.എക്‌സ്.(ഒ) വേരിയന്റിലും പ്രവര്‍ത്തിക്കുന്നത്. 1987 സി.സിയില്‍ 174 പി.എസ്. പവറും 205 എന്‍.എം. ടോര്‍ക്കുമാണ് റെഗുലര്‍ മോഡലിന്റെ കരുത്ത്. സി.വി.ടി. ഗിയര്‍ബോക്‌സാണ് ഇതില്‍ ട്രാന്‍സ്മിഷന്‍ ഒരുക്കുന്നത്. പെട്രോള്‍ എന്‍ജിനില്‍ എത്തുന്നതിനൊപ്പം ഹൈബ്രിഡ് സാങ്കേതിക വിദ്യയിലുള്ള ഹൈക്രോസും നിരത്തുകളില്‍ എത്തുന്നുണ്ട്.

സെല്‍ഫ് ചാര്‍ജിങ്ങ് സ്‌ട്രോങ്ങ് ഹൈബ്രിഡ് ഇലക്ട്രിക് സിസ്റ്റത്തിനൊപ്പം ടൊയോട്ട ന്യൂ ഗ്ലോബല്‍ ആര്‍ക്കിടെക്ചര്‍ അടിസ്ഥാനമാക്കിയുള്ള 2.0 ലിറ്റര്‍ നാല് സിലിണ്ടര്‍ പെട്രോള്‍ എന്‍ജിനാണ് ഹൈബ്രിഡ് മോഡലില്‍ പ്രവര്‍ത്തിക്കുന്നത്. ഇത് 186 പി.എസ്. പവറും 206 എന്‍.എം. ടോര്‍ക്കും നല്‍കും. ഇ-ഡ്രൈവ് വിത്ത് സീക്വന്‍ഷ്യല്‍ ഷിഫ്റ്റ് ആണ് ഇതിലെ ട്രാന്‍സ്മിഷന്‍. ഈ മോഡലാണ് സെഗ്മെന്റില്‍ തന്നെ ഏറ്റവും ഉയര്‍ന്ന ഇന്ധനക്ഷമതയായ 21.1 കിലോമീറ്റര്‍ മൈലേജ് നല്‍കുന്നത്.