തൊടുപുഴ∙  ക്രിസ്മസ് – ന്യൂഇയർ അവധി ആഘോഷിക്കാൻ ഇടുക്കിയിലെ വിവിധ വിനോദസഞ്ചാര കേന്ദ്രങ്ങളിൽ വൻ തിരക്ക്. ചെറുതും വലുതുമായ വിനോദസഞ്ചാര കേന്ദ്രങ്ങളിലെല്ലാം വലിയ ജനത്തിരക്കുണ്ട്. അതിശൈത്യം ആരംഭിച്ചതോടെ മൂന്നാറിൽ വിനോദ സഞ്ചാരികളുടെ തിരക്കേറി. ശനിയാഴ്ച മുതലാണ് മൂന്നാറിൽ സഞ്ചാരികളുടെ തിരക്ക് ആരംഭിച്ചത്.

 ഒരാഴ്ചത്തെ ഇടവേളയ്ക്ക് ശേഷം മൂന്നാറിൽ തണുപ്പും കഴിഞ്ഞ രണ്ടുദിവസമായി ശക്തമായി. സീസണിലെ ഏറ്റവും താഴ്ന്ന താപനിലയായ നാല് ഇന്നലെ രേഖപ്പെടുത്തി. ചെണ്ടുവര, തെന്മല, കുണ്ടള,ചിറ്റുവര എന്നിവിടങ്ങളിലാണ് ഇന്നലെ നാല് ഡിഗ്രി സെൽഷ്യസ് രേഖപ്പെടുത്തിയത്. മൂന്നാർ ടൗൺ, നല്ലതണ്ണി എന്നിവിടങ്ങളിൽ ആറും മാട്ടുപ്പെട്ടിയിൽ എട്ടുമായിരുന്നു ഇന്നലത്തെ താപനില. സഞ്ചാരികളുടെ വരവ് വർധിച്ചതോടെ ടൗൺ ഉൾപ്പെടെയുള്ള സ്ഥലങ്ങളിൽ ഗതാഗത കുരുക്കും പതിവായി.

വാഗമണ്ണിലും തിരക്ക് കൂടി

 വന്നുപോകുന്ന സഞ്ചാരികളാണ് ഇപ്പോൾ അധികവും. ക്രിസ്മസ് കഴിഞ്ഞ് ന്യൂഇയർ വരെയുള്ള ദിവസങ്ങളിലാണ് ഹോട്ടൽ മുറികളിലും ഹോംസ്റ്റേകളിലും തിരക്ക് വർധിക്കുന്നത്. കാലാവസ്ഥയും അനുകൂലമായതോടെ വരും ദിവസങ്ങളിൽ വാഗമൺ സഞ്ചാരികളെക്കൊണ്ട് നിറയാനാണ് സാധ്യത. വാഗമണ്ണിലെ മൊട്ടക്കുന്നുകൾ, പൈൻ ഫോറസ്റ്റ്, വിവിധ വ്യൂ പോയ്ന്റുകൾ, തേയിലത്തോട്ടങ്ങൾ, അഡ്വഞ്ചർ പാർക്ക്, സിനിമ ഷൂട്ടിങ് ലൊക്കേഷനുകൾ എന്നിവയിലെല്ലാം വൻ തിരക്കാണ്. തമിഴ്നാട്ടിൽ നിന്നുള്ള സഞ്ചാരികളും ധാരാളമുണ്ട്.