പശ്ചിമേഷ്യയിൽ യുദ്ധം രൂക്ഷമാവുകയും ഹോർമുസ് കടലിടുക്കിലൂടെയുള്ള ഇന്ധന വിതരണം തടസ്സപ്പെടുകയും ചെയ്യുന്ന സാഹചര്യത്തിൽ, ഇന്ത്യയിലേക്ക് കൂടുതൽ അസംസ്‌കൃത എണ്ണ എത്തിക്കാൻ റഷ്യ സന്നദ്ധത അറിയിച്ചു. ആഗോള ഊർജ്ജ വ്യാപാരത്തിന്റെ നിർണ്ണായക പാതയായ ഹോർമുസ് കടലിടുക്കിലെ സംഘർഷം ഇന്ത്യയുടെ ഇന്ധന സുരക്ഷയെ ബാധിക്കുമെന്ന ആശങ്കകൾക്കിടയിലാണ് റഷ്യയുടെ ഈ നിർണ്ണായക നീക്കം.

നിലവിൽ ഏകദേശം 95 ലക്ഷം ബാരൽ റഷ്യൻ അസംസ്‌കൃത എണ്ണയുമായി കപ്പലുകൾ ഇന്ത്യൻ സമുദ്രമേഖലയ്ക്ക് സമീപമുണ്ടെന്നും വിതരണ തടസ്സം നേരിട്ടാൽ ആഴ്ചകൾക്കുള്ളിൽ ഇവ ഇന്ത്യയിലെത്തിക്കാൻ കഴിയുമെന്നും റോയിട്ടേഴ്സ് റിപ്പോർട്ട് ചെയ്തു.

ഈ കപ്പലുകൾ യഥാർത്ഥത്തിൽ എവിടേക്ക് പോകാൻ നിശ്ചയിച്ചിരുന്നവയാണെന്ന് വ്യക്തമല്ലെങ്കിലും, വിതരണ പ്രതിസന്ധി രൂക്ഷമായാൽ ഇവ വേഗത്തിൽ ഇന്ത്യയിലേക്ക് തിരിച്ചുവിടാൻ കഴിയുമെന്ന് ഈ രംഗത്തെ വിദഗ്ധർ ചൂണ്ടിക്കാട്ടുന്നു.

ഇന്ത്യയുടെ പരിമിതമായ എണ്ണശേഖരം ആഗോള വിതരണത്തിലുണ്ടാകുന്ന പെട്ടെന്നുള്ള തടസ്സങ്ങൾ നേരിടാൻ പര്യാപ്തമല്ല. ഏകദേശം 25 ദിവസത്തെ ആവശ്യത്തിനുള്ള ക്രൂഡ് ഓയിൽ ശേഖരം മാത്രമാണ് നിലവിൽ ഇന്ത്യയിലുള്ളത്.

ഡീസൽ, പെട്രോൾ, പാചകവാതകം എന്നിവയുടെ ശേഖരവും താരതമ്യേന കുറവാണ്. പശ്ചിമേഷ്യൻ യുദ്ധം അടുത്ത 10-15 ദിവസത്തേക്ക് കൂടി തുടർന്നാൽ അത് ഇന്ത്യയിലേക്കുള്ള എണ്ണ വരവിനെ സാരമായി ബാധിക്കുമെന്ന് സർക്കാർ വൃത്തങ്ങൾ ഭയപ്പെടുന്നു.

ഇന്ത്യയുടെ ക്രൂഡ് ഓയിൽ ഇറക്കുമതിയുടെ 40 ശതമാനവും ഹോർമുസ് കടലിടുക്ക് വഴിയാണ് വരുന്നത്. പ്രതിദിനം 56 ലക്ഷം ബാരൽ എണ്ണയാണ് ഇന്ത്യൻ റിഫൈനറികൾ സംസ്കരിക്കുന്നത്. അതിനാൽ തന്നെ ഷിപ്പിംഗ് റൂട്ടുകളിലെ ഏത് തടസ്സവും ഇന്ത്യയെ പെട്ടെന്ന് പ്രതിസന്ധിയിലാക്കും.

മിഡിൽ ഈസ്റ്റിൽ നിന്നുള്ള വിതരണം തടസ്സപ്പെട്ടാൽ ഇന്ത്യയുടെ ക്രൂഡ് ഓയിൽ ആവശ്യകതയുടെ 40 ശതമാനം വരെ നിറവേറ്റാൻ തയ്യാറാണെന്ന് മോസ്കോ അറിയിച്ചിട്ടുണ്ട്.

ഈ വർഷം ജനുവരിയിൽ അമേരിക്കയുമായുള്ള വ്യാപാര ബന്ധം മെച്ചപ്പെടുത്തുന്നതിന്റെ ഭാഗമായി ഇന്ത്യ റഷ്യയിൽ നിന്നുള്ള ഇറക്കുമതി കുറച്ചിരുന്നു. എന്നാൽ ഫെബ്രുവരിയിൽ ഇത് വീണ്ടും 30 ശതമാനമായി വർദ്ധിച്ചു. പശ്ചിമേഷ്യയിലെ സാഹചര്യം മാറുന്നതിനനുസരിച്ച് റഷ്യൻ എണ്ണ കൂടുതൽ വാങ്ങുന്ന കാര്യത്തിൽ സർക്കാർ പുതിയ മാർഗ്ഗനിർദ്ദേശങ്ങൾ നൽകിയേക്കും.

കഴിഞ്ഞ മാസം യുഎസ് പ്രസിഡന്റ് ഡൊണാൾഡ് ട്രംപ് റഷ്യൻ എണ്ണയുമായി ബന്ധപ്പെട്ട ഇറക്കുമതി തീരുവകൾ ഒഴിവാക്കിയെങ്കിലും, റഷ്യൻ എണ്ണ വാങ്ങുന്നത് ഇന്ത്യ നിർത്തിയെന്നായിരുന്നു അദ്ദേഹത്തിന്റെ അവകാശവാദം. എന്നാൽ വിപണി സാഹചര്യങ്ങൾക്കും അന്താരാഷ്ട്ര ചലനങ്ങൾക്കും അനുസരിച്ചാണ് തങ്ങൾ ഊർജ്ജം വാങ്ങുന്നതെന്ന് ഇന്ത്യ വ്യക്തമാക്കിയിട്ടുണ്ട്.

ഗൾഫ് മേഖലയിലെ പ്രതിസന്ധി ആഗോള ഊർജ്ജ വിപണിയെയും മാറ്റിമറിക്കുകയാണ്. 2022-ൽ ഉക്രെയ്ൻ യുദ്ധം ആരംഭിച്ചത് മുതൽ റഷ്യൻ എണ്ണ കുറഞ്ഞ നിരക്കിൽ ലഭ്യമായിരുന്നു.

എന്നാൽ ഇപ്പോൾ വിതരണത്തിൽ കുറവുണ്ടായതോടെ ഈ ആനുകൂല്യവും കുറയാൻ സാധ്യതയുണ്ട്. ഇതിനുപുറമെ, പശ്ചിമേഷ്യൻ യുദ്ധം മൂലം ഖത്തറിൽ ഉൽപ്പാദനം തടസ്സപ്പെട്ടതോടെ ഇന്ത്യയ്ക്ക് ആവശ്യമായ എൽഎൻജി (LNG) നൽകാനും റഷ്യ സന്നദ്ധത പ്രകടിപ്പിച്ചിട്ടുണ്ട്.