ഇടുക്കി: വിനോദസഞ്ചാരികളുടെ തിരക്ക് മൂലം മൂന്നാറിലുണ്ടായ കടുത്ത ഗതാഗതക്കുരുക്കിൽപ്പെട്ട് യുവാവിന് ജീവൻ നഷ്ടമായി. വട്ടവട സ്വദേശി മാരിസ്വാമി പാൽരാജ് (35) ആണ് ചികിത്സ കിട്ടാൻ വൈകിയതിനെത്തുടർന്ന് മരണപ്പെട്ടത്. രക്തം ഛർദിച്ച് അതീവ ഗുരുതരാവസ്ഥയിലായിരുന്ന മാരിസ്വാമിയെ മൂന്നാറിലെ ആശുപത്രിയിലെത്തിക്കാൻ മൂന്ന് മണിക്കൂറിലധികം സമയമെടുത്തു.
മാരിസ്വാമിക്ക് ശാരീരിക അസ്വാസ്ഥ്യം അനുഭവപ്പെട്ടതിനെത്തുടർന്ന് ഉടൻതന്നെ ആശുപത്രിയിലേക്ക് തിരിക്കാൻ ബന്ധുക്കൾ ശ്രമിച്ചെങ്കിലും മൂന്നാറിലെ റോഡുകളിൽ അനുഭവപ്പെട്ട കിലോമീറ്ററുകളോളം നീളുന്ന ഗതാഗതക്കുരുക്ക് തടസ്സമായി. വിനോദസഞ്ചാരികളുടെ വാഹനങ്ങൾ റോഡ് കൈയടക്കിയതോടെ ആംബുലൻസ് ഉൾപ്പെടെയുള്ള വാഹനങ്ങൾക്ക് മുന്നോട്ട് നീങ്ങാൻ കഴിയാത്ത സാഹചര്യമായിരുന്നു.
സാധാരണ നിലയിൽ വട്ടവടയിൽ നിന്ന് വളരെ വേഗത്തിൽ എത്താവുന്ന മൂന്നാറിലേക്ക് ഗതാഗതക്കുരുക്ക് മൂലം മൂന്ന് മണിക്കൂറോളമാണ് എടുത്തത്. ആശുപത്രിയിൽ എത്തിച്ചപ്പോഴേക്കും മാരിസ്വാമിയുടെ നില അതീവ ഗുരുതരമായി മാറിയിരുന്നു. കൃത്യസമയത്ത് വൈദ്യസഹായം ലഭ്യമാക്കാൻ കഴിഞ്ഞിരുന്നെങ്കിൽ ജീവൻ രക്ഷിക്കാമായിരുന്നുവെന്നാണ് ബന്ധുക്കൾ പറയുന്നത്.
വിനോദസഞ്ചാര സീസണുകളിൽ മൂന്നാറിലെ ഗതാഗത സംവിധാനം നിയന്ത്രിക്കുന്നതിൽ അധികൃതർ വരുത്തുന്ന വീഴ്ചയ്ക്കെതിരെ നാട്ടുകാരിൽ നിന്ന് വലിയ പ്രതിഷേധമാണ് ഉയരുന്നത്. പാർക്കിങ് നിയന്ത്രണങ്ങളില്ലാത്തതും പോലീസിന്റെ അപര്യാപ്തമായ സാന്നിധ്യവുമാണ് ഇത്തരം കുരുക്കുകൾക്ക് കാരണമാകുന്നതെന്ന് നാട്ടുകാർ ആരോപിക്കുന്നു.
Jeevan TV 