മലപ്പുറം: മലപ്പുറത്ത് സ്കൂട്ടറില് പോവുകയായിരുന്ന യുവതിയെ തടഞ്ഞുനിർത്തി കുത്തി കൊലപ്പെടുത്താൻ ശ്രമം. ഇന്ന് രാവിലെ മലപ്പുറം നഗരത്തിനോട് ചേർന്നുള്ള പെൻഷൻ ഭവൻ റോഡിലാണ് ആക്രമണമുണ്ടായത്. അക്രമത്തിന് ശേഷം രക്ഷപ്പെട്ട പ്രതി പാലക്കാട് നല്ലേപ്പിള്ളി സ്വദേശി പി എസ് അശ്വിനായി പൊലീസ് തെരച്ചില് തുടരുകയാണ്.
സ്കൂട്ടറില് വരികയായിരുന്ന 28കാരിയെ ബൈക്കിലെത്തിയ അശ്വിൻ തടഞ്ഞുനിർത്തി കത്തികൊണ്ട് കുത്തുകയായിരുന്നു. താഴെ വീണ യുവതിയുടെ ദേഹത്ത് കയറിയിരുന്ന് കഴുത്തില് കുത്താൻ ശ്രമിച്ചെങ്കിലും അതുവഴി മറ്റ് യാത്രക്കാർ വന്നതോടെ ഇയാള് പെട്ടെന്ന് പിൻമാറി ബൈക്കില് കയറി രക്ഷപ്പെടുകയായിരുന്നു. തലയ്ക്കും കൈക്കും പരിക്കേറ്റ യുവതിയെ മലപ്പുറം സഹകരണ ആശുപത്രിയിലെത്തിച്ച് ചികിത്സ നല്കി. പരിക്ക് ഗുരുതരമല്ലെന്ന് പൊലീസ് അറിയിച്ചു.
ആക്രമിക്കാൻ പ്രതി കൊണ്ടുവന്ന കത്തി സ്ഥലത്ത് നിന്നും കണ്ടെത്തിയിട്ടുണ്ട്.
ഒരേ സ്വകാര്യ സ്ഥാപനത്തില് ജോലിക്കാരായിരുന്ന അശ്വിനും യുവതിയും നേരത്തെ സുഹൃത്തുക്കളായിരുന്നെങ്കിലും പിന്നീട് പിണങ്ങി. മറ്റൊരു യുവാവുമായി വിവാഹം ഉറപ്പിച്ചതോടെ യുവതിയെ അശ്വിൻ ഫോണിലൂടെ വിളിച്ചും സന്ദേശങ്ങളയച്ചും നിരന്തരം ഭീഷണിപെടുത്തിയിരുന്നു.
ഇതിനിടെയാണ് കൊലപാതകശ്രമം ഉണ്ടായത്.
Jeevan TV 