റീൽസ് ചിത്രീകരിക്കാൻ ചുവന്ന വെളിച്ചം കാണിച്ച് ട്രെയിൻ തടഞ്ഞു; രണ്ട് യുവാക്കൾക്കെതിരെ കേസ്.

സോഷ്യൽ മീഡിയയിൽ റീലുകൾ ചെയ്യുന്നതിനായി ചുവന്ന വെളിച്ചം കാണിച്ച് ട്രെയിൻ തടഞ്ഞ രണ്ട് യുവാക്കളെ ആർ.പി.എഫ് പിടികൂടി. വ്യാഴാഴ്ച പുലർച്ചെ 1.50-ഓടെ എറണാകുളം-പുണെ എക്സ്പ്രസ് തലശ്ശേരി സ്റ്റേഷൻ വിട്ടതിന് തൊട്ടുപിന്നാലെയാണ് സംഭവം.

ട്രാക്കിന് സമീപം നിന്ന് യുവാക്കൾ ചുവന്ന വെളിച്ചം മിന്നിക്കുന്നത് കണ്ട് അപകടസൂചനയാണെന്ന് കരുതി ലോക്കോ പൈലറ്റ് ട്രെയിൻ വേഗത കുറയ്ക്കുകയും നിർത്തുകയുമായിരുന്നു.

ലോക്കോ പൈലറ്റ് നൽകിയ വിവരത്തിന്റെ അടിസ്ഥാനത്തിൽ ആർ.പി.എഫ് നടത്തിയ തിരച്ചിലിലാണ് യുവാക്കളെ കണ്ടെത്തിയത്. ട്രെയിൻ നിർത്തുന്ന രംഗങ്ങൾ മൊബൈൽ ഫോണിൽ ചിത്രീകരിക്കുന്നതിനിടെയാണ് ഇവർ പിടിയിലായത്.

18 വയസ്സുള്ള പ്ലസ് ടു വിദ്യാർത്ഥികളാണ് പിടിയിലായതെന്ന് റെയിൽവേ ഉദ്യോഗസ്ഥർ സ്ഥിരീകരിച്ചു. ഇവരുടെ അറസ്റ്റ് രേഖപ്പെടുത്തിയ ശേഷം പിന്നീട് ജാമ്യത്തിൽ വിട്ടയച്ചു. റീൽസ് ചിത്രീകരിക്കാൻ ഉപയോഗിച്ച മൊബൈൽ ഫോൺ പോലീസ് പിടിച്ചെടുത്തിട്ടുണ്ട്.

റെയിൽവേ ട്രാക്കുകളിലും ട്രെയിനുകളിലും റീൽസ് ചിത്രീകരിക്കുന്നത് വലിയ അപകടങ്ങൾക്ക് കാരണമാകുമെന്ന് അധികൃതർ മുന്നറിയിപ്പ് നൽകി. ട്രെയിൻ അനാവശ്യമായി നിർത്തുന്നത് വലിയ നിയമക്കുരുക്കുകൾക്കും ശിക്ഷകൾക്കും ഇടയാക്കും. ഇത്തരം പ്രവണതകൾ വർദ്ധിച്ചു വരുന്ന സാഹചര്യത്തിൽ ട്രാക്കുകൾ കേന്ദ്രീകരിച്ച് നിരീക്ഷണം ശക്തമാക്കാനാണ് റെയിൽവേയുടെ തീരുമാനം. യുവാക്കൾക്കെതിരെ റെയിൽവേ നിയമപ്രകാരം ശക്തമായ വകുപ്പുകൾ ചുമത്തിയാണ് കേസെടുത്തിരിക്കുന്നത്.

റെയിൽവേ ട്രാക്കുകളിലും പരിസരങ്ങളിലും അപകടകരമായ രീതിയിൽ റീൽസ് ചിത്രീകരിക്കുന്നത് തടയാൻ കർശനമായ നിയമങ്ങളും പിഴകളുമാണ് ഇന്ത്യൻ റെയിൽവേ നടപ്പിലാക്കുന്നത്. ട്രെയിൻ യാത്രക്കാരുടെ സുരക്ഷയെ ബാധിക്കുന്ന ഇത്തരം പ്രവർത്തികൾ ജാമ്യമില്ലാ കുറ്റമായി വരെ കണക്കാക്കാം.

യാത്രക്കാരുടെ സുരക്ഷയ്ക്കും ട്രെയിൻ ഗതാഗതം തടസ്സമില്ലാതെ നടത്തുന്നതിനും പൊതുജനങ്ങൾ സഹകരിക്കണമെന്ന് റെയിൽവേ അഭ്യർത്ഥിക്കുന്നു. സ്റ്റേഷനുകളിലോ പ്ലാറ്റ്‌ഫോമുകളിലോ അനുമതിയില്ലാതെ പ്രൊഫഷണൽ ക്യാമറകൾ ഉപയോഗിച്ച് ഷൂട്ടിംഗ് നടത്തുന്നതും പിഴ ലഭിക്കാവുന്ന കുറ്റമാണ്.