യുവതി എസ്ഐയുടെ മൂക്കിടിച്ച് തകർത്തു;വാഹനപരിശോധനയ്ക്കിടെ യുവതിയും യുവാവും പൊലീസിനെ ആക്രമിച്ചു.

മൊബൈൽ ഫോൺ പരിശോധിക്കുമ്പോൾ സ്ത്രീ എസ്ഐയുടെ മൂക്കിനിടിക്കുകയായിരുന്നു

അങ്കമാലി: അങ്കമാലി അയ്യമ്പുഴയിൽ വാഹനപരിശോധനയ്ക്കിടെ യുവതിയും യുവാവും പൊലീസിനെ ആക്രമിച്ചു. നേപ്പാൾ സ്വദേശികളായ ​ഗീത, സുമൻ എന്നിവരാണ് പൊലീസിനെ ആക്രമിച്ചത്. ഇവർ പോലീസ് ഉദ്യോ​ഗസ്ഥരെ മർദിക്കുകയും കടിക്കുകയും ചെയ്തു. സംഭവത്തിൽ എസ്ഐ ഉൾപ്പെടെ നാല് പോലീസുകാർക്ക് പരിക്കേറ്റു.വാഹനപരിശോധനയ്ക്കിടെ സംശയകരമായ സാഹചര്യത്തിൽ വന്ന സ്ത്രീയേയും പുരുഷനേയും പൊലീസ് പിടികൂടുകയായിരുന്നു. ഇവരുടെ മൊബൈൽ ഫോൺ പരിശോധിക്കുമ്പോൾ സ്ത്രീ എസ്ഐയുടെ മൂക്കിനിടിക്കുകയായിരുന്നു. കയ്യാങ്കളിയായതോടെ നാട്ടുകാരുടെ സഹായത്തോടെ പൊലീസ് ജീപ്പിൽ കയറ്റി. എന്നാൽ രണ്ടുപേരുടേയും പരാക്രമം അവിടംകൊണ്ടും തീർന്നില്ല.