പ്രതീകാത്മക ചിത്രം

പത്തനംതിട്ട ∙ ശബരിമല ദർശനത്തിനെത്തിയ മൂന്ന്‌ തീർഥാടകർ മലകയറുന്നതിനിടെ കുഴഞ്ഞുവീണ്‌ മരിച്ചു. ആന്ധ്രാപ്രദേശ്‌ സ്വദേശികളായ ‌വേൽപ്പുരി വെങ്കയ്യ (65), നീലം ചന്ദ്രശേഖർ (55), ബെംഗളൂരു സ്വദേശിയായ സി.പി.കുമാർ (44), എന്നിവരാണ്‌ മരിച്ചത്‌.

വേൽപ്പുരി വെങ്കയ്യയ്ക്ക് നീലിമലയിൽ വെച്ച്‌ ബുധനാഴ്‌ച്ച രാത്രി 8.47ന്‌ നെഞ്ചുവേദന ഉണ്ടായതിനെ തുടർന്ന് പമ്പാ ആശുപത്രിയിൽ എത്തിച്ചെങ്കിലും മരിച്ചു. വ്യാഴാഴ്ച പുലർച്ചെ 3.23ന് അപ്പാച്ചിമേട്ടിൽ വച്ചാണ് സി.പി.കുമാർ അസ്വസ്ഥത പ്രകടിപ്പിച്ചത്. തുടർന്ന് അപ്പാച്ചിമേട്‌ കാർഡിയോളജി സെന്ററിൽ എത്തിച്ചെങ്കിലും രക്ഷിക്കാനായില്ല. വ്യാഴാഴ്ച പമ്പ ഒന്നാം നമ്പർ ഷെഡിൽ വച്ചാണ് നീലം ചന്ദ്രശേഖറിന് ദേഹാസ്വാസ്‌ഥ്യം ഉണ്ടാകുന്നത്. തുടർന്ന് ഇദ്ദേഹത്തെ പമ്പ ഗവ. ആശുപത്രിയിൽ എത്തിച്ചെങ്കിലും മരിച്ചു.