13-കാരിയെ പീഡിപ്പിച്ച് കൊലപ്പെടുത്തിയ സംഭവത്തിൽ നീതി ആവശ്യപ്പെട്ട് നാട്ടുകാർ നടത്തിയ പ്രതിഷേധമാർച്ച് | Screengrab Courtesy: x.com/HathodaPost

മുംബൈ : മഹാരാഷ്ട്രയിലെ ജലഗാവില്‍ പ്രായപൂര്‍ത്തിയാകാത്ത പെണ്‍കുട്ടിയെ ലൈംഗികമായി പീഡിപ്പിച്ചശേഷം കല്ലെറിഞ്ഞ് കൊലപ്പെടുത്തി. ജലഗാവിലെ ചോപ്ഡയിലാണ് ദാരുണസംഭവം. പെണ്‍കുട്ടിയെ കൊലപ്പെടുത്തിയ കേസില്‍ പ്രതിയെ അറസ്റ്റ് ചെയ്തതായും വിശദമായ അന്വേഷണം തുടരുകയാണെന്നും ചോപ്ഡ പോലീസ് അറിയിച്ചു.

ചോപ്ഡ സ്വദേശിനിയായ 13-കാരിയെയാണ് അതിക്രൂരമായി പീഡിപ്പിച്ചശേഷം ശരീരത്തിലേക്ക് കല്ലെടുത്തിട്ട് കൊലപ്പെടുത്തിയത്. പെണ്‍കുട്ടി വീട്ടില്‍ ഒറ്റയ്ക്കായിരുന്ന സമയത്താണ് പ്രതി അതിക്രമം കാട്ടിയത്. വീട്ടില്‍ക്കയറി പെണ്‍കുട്ടിയെ പുറത്തേക്ക് കൂട്ടിക്കൊണ്ടുപോയശേഷം ലൈംഗികമായി പീഡിപ്പിക്കുകയും പിന്നാലെ കൊലപ്പെടുത്തുകയുമായിരുന്നു.

അതേസമയം, 13-കാരിയെ പീഡിപ്പിച്ച് കൊലപ്പെടുത്തിയ സംഭവത്തില്‍ പ്രതിയെ അറസ്റ്റ് ചെയ്‌തെങ്കിലും ജലഗാവില്‍ ജനങ്ങള്‍ പ്രതിഷേധവുമായി തെരുവിലിറങ്ങി. പ്രതിക്കെതിരേ കടുത്ത നടപടി ആവശ്യപ്പെട്ടാണ് സ്ത്രീകളും പെണ്‍കുട്ടികളും അടക്കമുള്ളവര്‍ പ്രതിഷേധപ്രകടനങ്ങള്‍ സംഘടിപ്പിച്ചത്.