പ്രതീകാത്മക ചിത്രം

തെന്മല(കൊല്ലം):മാമ്പഴത്തറയിൽ ഭാര്യയെ വെട്ടിപ്പരിക്കേൽപ്പിച്ചശേഷം വനത്തിലേക്ക് ഓടി രക്ഷപ്പെട്ട ഭർത്താവ് അറസ്റ്റിൽ. മാമ്പഴത്തറ സ്വദേശിയായ രമേശനാണ് തെന്മല പോലീസിന്റെ പിടിയിലായത്.

കഴിഞ്ഞ 13-ന് മാമ്പഴത്തറ സ്വദേശിനിയായ ശ്രീകലയെ തൊഴിലുറപ്പ് ജോലിചെയ്യുന്നതിനിടെ പിന്നിൽക്കൂടിയെത്തി വെട്ടുകത്തികൊണ്ട് മുതുകിൽ വെട്ടിപ്പരിക്കേൽപ്പിക്കുകയായിരുന്നു.

ഒഴിഞ്ഞുമാറുകയും കൂടെയുണ്ടായിരുന്നവർ അലറിവിളിക്കുകയും ചെയ്തതുകൊണ്ടാണ് കഴുത്തിൽ വെട്ടേൽക്കാതെ രക്ഷപ്പെട്ടത്. ഇതിനിടെ രമേശൻ വനത്തിലേക്ക് രക്ഷപ്പെട്ടിരുന്നു. പരിക്കേറ്റ ശ്രീകല പുനലൂർ താലൂക്ക് ആശുപത്രിയിലെ ചികിത്സയിലാണ്. കുടുംബവഴക്കാണ് ഭാര്യയെ വെട്ടിപ്പരിക്കേൽപ്പിക്കാൻ കാരണം.

ഇയാൾ മുൻപും ശ്രീകലയെ വെട്ടിപ്പരിക്കേൽപ്പിച്ചിട്ടുണ്ട്. പ്രതിയെ റിമാൻഡ് ചെയ്തു. എസ്.ഐ.മാരായ അമീൻ, ഹരികുമാർ, സി.പി.ഒ.മാരായ മനു, പ്രവീൺ, രഞ്ജിത്ത് എന്നിവരാണ് പ്രതിയെ പിടികൂടിയത്.