കേരള ഹൈക്കോടതി
കൊച്ചി : മലയാള ചലച്ചിത്രരംഗത്ത് സ്ത്രീകള് നേരിടുന്ന പ്രശ്നങ്ങള് സംബന്ധിച്ച ഹേമ കമ്മിറ്റി റിപ്പോര്ട്ടിന്റെ പൂര്ണരൂപം മുദ്രവെച്ച കവറില് ഹാജരാക്കാന് ആവശ്യപ്പെട്ട് ഹൈക്കോടതി. റിപ്പോര്ട്ടിന്റെ അടിസ്ഥാനത്തില് ക്രിമിനല് കേസ് രജിസ്റ്റര് ചെയ്യണമെന്നാവശ്യപ്പെട്ട് നല്കിയ ഹര്ജി ഫയലില് സ്വീകരിച്ചുകൊണ്ടാണ് ഹൈക്കോടതി ഉത്തരവ്.
സെപ്റ്റംബര് 10-ന് കോടതിയില് ഹാജരാക്കാനാണ് നിര്ദേശം. കേസ് എടുക്കുന്നത് സംബന്ധിച്ച് സര്ക്കാര് വിശദമായ സത്യവാങ്മൂലം നല്കണമെന്നും കോടതി നിര്ദേശിച്ചിട്ടുണ്ട്.
ആക്ടിങ് ചീഫ് ജസ്റ്റിസ് ഉള്പ്പെട്ട ഡിവിഷന് ബെഞ്ചാണ് മുദ്രവെച്ച കവറില് റിപ്പോര്ട്ട് സമര്പ്പിക്കാന് ഉത്തരവിട്ടിരിക്കുന്നത്. വ്യക്തിപരമായ പരാമര്ശങ്ങൾ ഉള്പ്പെട്ട പ്രസക്തഭാഗങ്ങള് ഒഴിവാക്കിയാണ് സര്ക്കാര് നിലവില് റിപ്പോര്ട്ട് പുറത്തുവിട്ടിരിക്കുന്നത്.
ഹേമ കമ്മിറ്റി റിപ്പോര്ട്ടില് സര്ക്കാര് എന്ത് നടപടിയാണ് എടുക്കുകയെന്ന് കോടതി ആരാഞ്ഞു. റിപ്പോര്ട്ടിലെ ലൈംഗിക പീഡന പരാതികള് പഠിക്കാന് അന്വേഷണ സമിതിയെ നിയമിക്കാനാകുമോ എന്നും കോടതി ചോദിച്ചു.
അതേസമയം, കമ്മിഷനു മുമ്പാകെ മൊഴി നല്കിയവര് പരാതി നല്കാത്തതാണ് കേസെടുക്കാത്തതിന് കാരണമെന്ന് സര്ക്കാരിന് വേണ്ടി ഹാജരായ അഡ്വക്കേറ്റ് ജനറല് പറഞ്ഞു. ഇരകള്ക്ക് പൊതുസമൂഹത്തിനു മുന്നില് വരാന് ബുദ്ധിമുട്ടുണ്ടാകുമെന്നും രഹസ്യാത്മകത ഉറപ്പുനല്കിയാണ് കമ്മിഷന് മൊഴിയെടുത്തിരുന്നതെന്നും എ.ജി. കൂട്ടിച്ചേര്ത്തു.
Jeevan TV 