ബ്ലാക്ക് മാൻ നസീർ, ഡാനിയൽ
പാലക്കാട്: നിരവധി കേസുകളില് പ്രതിയായ ബ്ലാക്ക് മാനും കൂട്ടാളിയും പാലക്കാട്ട് പിടിയില്. തൃശ്ശൂര് കൊക്കാല റെയില്വേസ്റ്റേഷന് സമീപമുള്ള ബ്ലാക്ക് മാന് എന്ന നസീര് (50), കൊല്ലം ഇരവിപുരം ലക്ഷം വീട് ഗാന്ധിനഗര് ഡാനി (ഡാനിയല്-44) എന്നിവരെയാണ് പാലക്കാട് ടൗണ് നോര്ത്ത് പോലീസ് പിടികൂടിയത്.
സബ് ഇന്സ്പെക്ടര് ഉണ്ണിക്കൃഷ്ണനും സംഘവും താണാവ് ജങ്ഷനു സമീപം വാഹനപരിശോധന നടത്തുന്നതിനിടെയാണ് സ്കൂട്ടറില് വരികയായിരുന്ന രണ്ടുപേരും പിടിയിലായത്.
സ്കൂട്ടര് പരിശോധിച്ചപ്പോള് വാഹനത്തിന്റെ സീറ്റിനടിയിലുള്ള അറയില് മാരകായുധങ്ങള് കാണപ്പെട്ടതില് സംശയം തോന്നി. ഈ വാഹനത്തിന്റെ ഉടമയെ ബന്ധപ്പെട്ടപ്പോള് കൊടുങ്ങല്ലൂരില്നിന്ന് മോഷണം പോയതാണ് സ്കൂട്ടറെന്ന് കണ്ടെത്തി.
പാലക്കാട് നഗരത്തില് വന് കവര്ച്ച ആസൂത്രണം ചെയ്താണ് പ്രതികള് വന്നത്. തൃശ്ശൂര് ജില്ലയില് നിരവധി കേസുകളിലെ പ്രതിയാണ് ബ്ലാക്ക് മാന് എന്നറിയപ്പെടുന്ന നസീര്. ഡാനിയെന്ന ഡാനിയലിന്റെ പേരില് പത്തോളം കേസുകളുണ്ട്. കോടതിയില് ഹാജരാക്കിയ പ്രതികളെ റിമാന്ഡ് ചെയ്തു.
എസ്.ഐ. രാജേഷ് എ.ബി.യുടെ നേതൃത്വത്തില് എസ്.ഐ. ഉണ്ണിക്കൃഷ്ണന്, എസ്.സി.പി.ഒ.മാരായ സുജീഷ്, വിനോദ്, സി.പി.ഒ. സതീഷ് തുടങ്ങിയവരടങ്ങുന്ന സംഘമാണ് പ്രതികളെ പിടികൂടിയത്.
Jeevan TV 