നാട്ടുകാരുമായി തർക്കിക്കുന്ന വിദേശ വനിത

കൊച്ചി: ഫോർട്ട്‌കൊച്ചിയിൽ സ്ഥാപിച്ച പലസ്തീൻ ഐക്യദാർഢ്യ ബോർഡുകൾ നശിപ്പിച്ച കേസിൽ ഓസ്ട്രേലിയൻ സ്വദേശിയായ ജൂത വനിതയ്ക്കെതിരേ പോലീസെടുത്ത കേസിലെ തുടർ നടപടികൾ ഹൈക്കോടതി സ്റ്റേ ചെയ്തു. മട്ടാഞ്ചേരി പോലീസ് രജിസ്റ്റർ ചെയ്ത കേസ് റദ്ദാക്കണം എന്നാവശ്യപ്പെട്ട് പ്രതിയായ സാറ ഷെലൻസ്കി മിഷേൽ നൽകിയ ഹർജിയിലാണ് ജസ്റ്റിസ് ബെച്ചു കുര്യൻ തോമസിന്റെ ഇടക്കാല ഉത്തരവ്.

കഴിഞ്ഞ ഏപ്രിലിലായിരുന്നു സംഭവം. ഫോർട്ട്‌കൊച്ചി സന്ദർശിക്കാനെത്തിയ യുവതി പലസ്തീൻ അനുകൂല ബോർഡുകൾ കീറുകയായിരുന്നു. സ്റ്റുഡന്റ്‌സ് ഇസ്‌ലാമിക് ഓർഗനൈസേഷൻ പ്രവർത്തകർ നൽകിയ പരാതിയിലാണ് കലാപമുണ്ടാക്കാൻ ശ്രമിച്ചു എന്നതടക്കമുള്ള വകുപ്പുകൾ പ്രകാരം കേസെടുത്തത്. പ്രതികളെ അറസ്റ്റ് ചെയ്തിരുന്നു. പിന്നീട് ഡൽഹി ഹൈക്കോടതിയുടെ അനുമതിയോടെയാണ് മടങ്ങിയത്. ഇതിനുശേഷമാണ് കേസ് റദ്ദാക്കാനായി ഹർജി നൽകിയത്.