സ്മൃതി മന്ദാനയ്‌ക്കൊപ്പം പലാഷ് മുഛൽ | Photo: Instagram/ Smriti Mandhana

പ്രണയത്തിന്റെ അഞ്ചാം വാര്‍ഷികം ആഘോഷിച്ച് ഇന്ത്യന്‍ വനിതാ ക്രിക്കറ്റ് താരം സ്മൃതി മന്ദാനയും സംഗീത സംവിധായകന്‍ പലാഷ് മുഛലും. സ്മൃതിക്കൊപ്പം കേക്ക് മുറിക്കുന്ന ചിത്രം പലാഷ് ഇന്‍സ്റ്റഗ്രാമില്‍ പങ്കുവെച്ചു. ഇതിനൊപ്പം അഞ്ച് എന്നെഴുതി ഹാര്‍ട്ട് ഇമോജിയും ഉണ്ട്.

ബോളിവുഡ് ഗായിക പലക് മുഛലിന്റെ സഹോദരന്‍ കൂടിയായ പലാഷ് സ്മൃതിയുമായി പ്രണയത്തിലാണെന്ന് നേരത്തെ റിപ്പോര്‍ട്ടുകള്‍ പുറത്തു വന്നിരുന്നു. വനിതാ പ്രീമിയര്‍ ലീഗില്‍ റോയല്‍ ചലഞ്ചേഴ്‌സ് ബാംഗ്ലൂര്‍ കിരീടം നേടിയപ്പോള്‍ അഭിനന്ദിക്കാന്‍ പലാഷുമെത്തിയിരുന്നു. സ്മൃതിക്കൊപ്പം കിരീടം പിടിച്ചുനില്‍ക്കുന്ന ചിത്രം പലാഷ് ഇന്‍സ്റ്റഗ്രാമില്‍ പോസ്റ്റും ചെയ്തു. പലാഷിന്റെ മാതാപിതാക്കളും ഫൈനല്‍ കാണാനെത്തിയിരുന്നു. ഇരുവര്‍ക്കുമൊപ്പം സ്മൃതി നില്‍ക്കുന്ന ചിത്രവും പലാഷ് ഇന്‍സ്റ്റ സ്റ്റോറിയായി പങ്കുവെച്ചിരുന്നു.

രണ്ട് വര്‍ഷം മുമ്പ് നടന്ന പലകിന്റെ വിവാഹത്തില്‍ സ്മൃതി പങ്കെടുത്തതോടെയാണ് ഇരുവരും പ്രണയത്തിലാണെന്ന വാര്‍ത്തകള്‍ പ്രചരിച്ചത്. സ്മൃതിയുടെ 27-ാം പിറന്നാള്‍ ആഘോഷിക്കാന്‍ പലാഷ് ബംഗ്ലാദേശിലേക്ക് പറക്കുകയും ചെയ്തു. കഴിഞ്ഞ ജൂലൈയിലും സ്മൃതിക്കൊപ്പമുള്ള ചിത്രം പങ്കുവെച്ച് പലാഷ് ‘4’ എന്ന് കുറിച്ചിരുന്നു.

സ്മൃതിപലാഷ് എന്ന പേരില്‍ ഒരു ഇന്‍സ്റ്റഗ്രാം അക്കൗണ്ടും നിലവിലുണ്ട്. ഇരുവരും ഒരുമിച്ചുള്ള ചിത്രങ്ങളും ഒരുമിച്ചുപോയ യാത്രയില്‍ നിന്നെടുത്ത ചിത്രങ്ങളുമെല്ലാം ഇതില്‍ പോസ്റ്റ് ചെയ്തിട്ടുണ്ട്. സ്മൃതിയുടെ ആരാധകരാണ് ഈ അക്കൗണ്ടിന് പിന്നില്‍.

പ്രൊഫഷണല്‍ ഗായകനും സംഗീത സംവിധായകനുമാണ് 28-കാരനായ പലാഷ്. സീഫൈവില്‍ സംപ്രേക്ഷണം ചെയ്ത അര്‍ഥ് എന്ന വെബ് സീരീസും പലാഷ് സംവിധാനം ചെയ്തിട്ടുണ്ട്. രാജ്പാല്‍ യാദവും റുബീന ദിലകും അഭിനയിച്ച ഈ ചിത്രത്തിലൂടെ മികച്ച നവാഗത സംവിധായകനുള്ള ദാദാ സാഹെബ് ഫാല്‍കെ പുരസ്‌കാരവും പലാഷ് നേടി.