സാമ്പാറിൽനിന്ന് കിട്ടിയ പ്ലാസ്റ്റിക് സഞ്ചി
പുറമേരി: കോഴിക്കോട് പുറമേരിയില് ഊണിനൊപ്പം വിളമ്പിയ സാമ്പാറില് പ്ലാസ്റ്റിക് കൂട് കണ്ടതിനെ തുടര്ന്ന് ആരോഗ്യ വകുപ്പ് ഹോട്ടല് പൂട്ടിച്ചു. ഹോട്ടലില് ഊണ് കഴിക്കുന്നതിനിടെയാണ് സാമ്പാറില് പ്ലാസ്റ്റിക് കൂട് കിട്ടിയത്.
വിവരം അറിയിച്ചപ്പോള്, കടയിലെ ജീവനക്കാരന് ‘കുഴപ്പമില്ല പ്ളാസ്റ്റിക് സഞ്ചിയല്ലേ’ എന്ന മറുപടി നല്കിയതോടെ ഊണ് കഴിക്കാനെത്തിയ ആള് ആരോഗ്യ വകുപ്പിനെ വിവരം അറിയ്ക്കുകയായിരുന്നു.സംഭവത്തിന്റെ വീഡിയോ പുറത്തെത്തിയിട്ടുണ്ട്.
കറിയില് പ്ലാസ്റ്റിക് കണ്ടെത്തിയത് പ്രശ്നമില്ലെന്ന നിലപാടിലാണ് കടയിലുള്ളവര്. ഭക്ഷണം കഴിക്കാനെത്തിയ ആള് പരാതി പറയുമ്പോള് അവിടെ ഉള്ളവര് ചിരിക്കുന്നതും വീഡിയോയിലുണ്ട്.
പരാതിയുടെ അടിസ്ഥാനത്തില് ആരോഗ്യ വകുപ്പ് നടത്തിയ പരിശോധനയില് ഊണില്നിന്ന് പ്ലാസ്റ്റിക് സഞ്ചി കണ്ടെടുത്ത് ഹോട്ടല് പൂട്ടിക്കുകയായിരുന്നു. സ്ഥാപനത്തിന് പിഴ ചുമത്തുമെന്നും ആരോഗ്യ വകുപ്പ് അധികൃതര് പറഞ്ഞു.
Jeevan TV 