സാറാ അലി ഖാൻ, മോഹൻകുമാർ ഫാൻസ് എന്ന ചിത്രത്തിൽ വിനയ് ഫോർട്ട് | ഫോട്ടോ: സ്ക്രീൻ​ഗ്രാബ്

അഭിനയത്തിനൊപ്പം അല്പം ചാരിറ്റി പ്രവർത്തനങ്ങളിലും താല്പര്യമുള്ളവരാണ് നടീനടന്മാർ. പക്ഷേ പലരും ചെയ്യുന്ന കാര്യങ്ങൾ അങ്ങനെ പുറത്തറിയിക്കാറില്ല. ഇവിടെ വഴിയിരികിൽ കണ്ട പാവപ്പെട്ടവർക്ക് ഏതാനുംപൊതി ഭക്ഷണം വിതരണംചെയ്തതിന്റെ പേരിൽ ട്രോളുകൾക്ക് ഇരയായിരിക്കുകയാണ് ബോളിവുഡ് താരം സാറാ അലി ഖാൻ. അതിന് കാരണമാവട്ടെ മലയാളികളും അവരുടെ രസകരമായ ഒരു കണ്ടെത്തലും.

രണ്ടുദിവസം മുമ്പാണ് ബോളിവുഡ് ഇൻസ്റ്റാ എന്ന ഇൻസ്റ്റാ​ഗ്രാംപേജിലൂടെ സാറാ അലി ഖാൻ റോഡരികിൽ ഭക്ഷണം വിതരണംചെയ്യുന്ന വീഡിയോ പുറത്തുവന്നത്. മുംബൈയിലെ ജൂഹുവിനടുത്താണ് ഈ സംഭവം നടന്നത്. റോഡരികിൽ ഇരിക്കുന്ന പാവങ്ങൾക്ക് കയ്യിൽക്കരുതിയ കവറുകളിൽനിന്ന് ഭക്ഷണം വിതരണംചെയ്യുകയാണ് താരം. ഇതിനിടെ ഇതിന്റെ ദൃശ്യങ്ങൾ പകർത്തുന്നവരെ സാറ ചീത്തവിളിക്കുന്നുമുണ്ട്. ഇതോടെ ഭക്ഷണം വാങ്ങിയവരും നടിക്കൊപ്പംചേരുന്നു.

ലക്ഷക്കണക്കിനാളുകളാണ് ഈ വീഡിയോ കാണുകയും പ്രതികരണമറിയിക്കുകയും ചെയ്തത്. പക്ഷേ അക്കൂട്ടത്തിലെ മലയാളികളായ ചിലർ സാറയുടെ ഈ പ്രവൃത്തിയിൽ രസകരമായ ഒരു കാര്യം കണ്ടെത്തി. ജിസ് ജോയ് സംവിധാനംചെയ്ത് 2021-ൽ പുറത്തിറങ്ങിയ മോഹൻകുമാർ ഫാൻസ് എന്ന ചിത്രത്തിലെ ഒരു കോമഡി രം​ഗവുമായിട്ടാണ് സാറയുടെ പ്രവൃത്തിയെ ഇവർ താരതമ്യപ്പെടുത്തിയിരിക്കുന്നത്.

കുഞ്ചാക്കോ ബോബൻ നായകനായെത്തിയ മോഹൻകുമാർ ഫാൻസിൽ ആഘോഷ് മേനോൻ എന്ന സൂപ്പർതാരമായെത്തിയത് വിനയ് ഫോർട്ടാണ്. ക്രിപേഷ് എന്നാണ് ഇയാളുടെ യഥാർത്ഥ പേര്. റോഡരികിൽ കഴിയുന്നവർക്ക് പർദയിട്ട് മുഖം മറച്ച് ഭക്ഷണം വിതരണം ചെയ്യാനെത്തുന്ന ആഘോഷ് മേനോനെ നാട്ടുകാർ തിരിച്ചറിയുകയും തടഞ്ഞുവെച്ച് വീഡിയോ എടുക്കുകയും ചെയ്യുന്നു. നടന്മാരും മനുഷ്യരാണെന്നും എടുത്ത വീഡിയോ ഡിലീറ്റ് ചെയ്യണമെന്നുമുള്ള ആഘോഷിന്റെ വീഡിയോ പൊടുന്നനെ വൈറലാവുകയും ഈ ദൃശ്യം ആലിയാ ഭട്ടും രോഹിത് ശർമയും ഉൾപ്പെടെയുള്ളവർ ഇത് ട്വിറ്ററിൽ പങ്കുവെയ്ക്കുന്നതുമാണ് രം​ഗം.

എന്തായാലും സാറയുടെ പ്രവർത്തിയെ അനുകൂലിച്ചും പരിഹസിച്ചും നിരവധി പ്രതികരണങ്ങളാണ് ഇപ്പോഴും വന്നുകൊണ്ടിരിക്കുന്നത്.