പ്രതീകാത്മക ചിത്രം.

തൊടുപുഴ: വീട്ടുകാര്‍ പള്ളിപ്പെരുന്നാളിന് പോയ ഒരു മണിക്കൂറിനുള്ളില്‍ വീട് കുത്തിത്തുറന്ന് വന്‍ മോഷണം. റിട്ട. കോളേജ് അധ്യാപകന്‍ നെടിയശ്ശാല മൂലശ്ശേരില്‍ എം.ടി. ജോണിന്റെ വീട്ടില്‍ നിന്നാണ് 20 പവന്‍ സ്വര്‍ണം നഷ്ടപ്പെട്ടത്. ശനിയാഴ്ച രാത്രി 6.45-നും 7.50-നും ഇടയിലാണ് മോഷണം നടന്നത്.

നെടിയശാല പള്ളിയിലെ തിരുനാളിനോട് അനുബന്ധിച്ചുള്ള പ്രദക്ഷിണത്തില്‍ പങ്കെടുക്കാനായി ജോണും ഭാര്യ ഫിലോമിനയും സഹോദരി ആലീസും പോയ തക്കംനോക്കി മോഷ്ടാക്കള്‍ വീട് കുത്തിത്തുറക്കുകയായിരുന്നു.

വീട്ടുകാര്‍ തിരിച്ചെത്തിയപ്പോഴാണ് മോഷണവിവരം അറിയുന്നത്. കരിങ്കുന്നം സി.ഐ. കെ.ആര്‍. മോഹന്‍ദാസിന്റെ നേതൃത്വത്തില്‍ പ്രത്യേക സ്‌ക്വാഡ് രൂപവത്കരിച്ച് അന്വേഷണം ആരംഭിച്ചു.