jeevan news online

വാർത്തകൾ വിശദമായി

ജയില്‍ചാടിയസ്ത്രീകള്‍ പിടിയില്‍



അട്ടക്കുളങ്ങരയില്‍ വനിതാ ജയില്‍ ചാടിയ യുവതികള്‍ പിടിയില്‍. ശില്‍പ്പ, സന്ധ്യ എന്നിവരാണ് പിടിയിലായത്. ചൊവ്വാഴ്ച വൈകുന്നേരമാണ് ഇരുവരും ജയില്‍ ചാടിയത്.കോടതിയില്‍ ഹാജരാക്കിയശേഷം ഇരുവരേയും ജയില്‍ അധികൃതര്‍ക്ക് കൈമാറും.


ശില്‍പ്പയുടെ വീട്ടിലേക്ക് പോകുന്ന വഴി പാലോട് പൊലീസും റൂറല്‍ എസ്പിയുടെ കീഴിലുള്ള ഷാഡോ പൊലീസും ചേര്‍ന്ന് ഇരുവരെയും പിടികൂടുകയായിരുന്നു. കേസ് അന്വേഷിക്കുന്ന ഫോര്‍ട്ട് പൊലീസിന്റെ നിരീക്ഷണത്തിലായിരുന്നു ഇരുവരും.


ഇരുവര്‍ക്കെതിരെയും ലുക്ക് ഔട്ട് നോട്ടീസ് പുറപ്പെടുവിച്ചിരുന്നു. തമിഴ്‌നാട്ടിലെയും കേരളത്തിലെയും എല്ലാ പൊലീസ് സ്റ്റേഷനുകളിലും രക്ഷപ്പെട്ട ശില്‍പ്പ, സന്ധ്യ എന്നിവരുടെ ചിത്രം വച്ചാണ് ലുക്ക് ഔട്ട് നോട്ടീസിറക്കിയത്. പ്രതികള്‍ തമിഴ്‌നാട്ടിലേക്ക് കടന്നതായും ഒളിവില്‍ പോയതായും പൊലീസ് സംശയിച്ചിരുന്നു.


പാങ്ങോട് സ്വദേശിയായ ശില്‍പയെ ജോലിക്ക് നിന്ന വീട്ടിലെ ഗൃഹനാഥന്റെ മോതിരം മോഷ്ടിച്ചതിനാണ് അറസ്റ്റ് ചെയ്തത്. മുക്കുപണ്ടം പണയപ്പെടുത്തി പണം തട്ടിയതിനാണ് വര്‍ക്കല സ്വദേശിയായ സന്ധ്യ അറസ്റ്റിലായത്. ഇരുവരും സാമ്പത്തികമായി താഴേത്തട്ടിലുള്ള കുടുംബത്തിലുള്ളവരാണ്.

 രണ്ട് പേരും ചെറിയ കുട്ടികളുടെ അമ്മമാരുമാണ്. ജാമ്യമെടുക്കാന്‍ പണമില്ലാത്തതിനാലാവണം ഇവര്‍ ജയില്‍ ചാടാന്‍ തീരുമാനിച്ചതെന്നായിരുന്നു പൊലീസ് സംശയം. വാടകയ്ക്ക് വാഹനങ്ങള്‍ നല്‍കുന്ന കടയില്‍ നിന്ന് സ്‌ക്കൂട്ടര്‍ തരപ്പെടുത്തിയായിരുന്നു ഇരുവരുടേയും യാത്ര. ഇതിനിടയിലാണ് പോലീസിന്റെ പിടിയിലായത്.

 

 










<

JEEVAN TV NEWS

JEEVAN TV NEWS