jeevan news online

വാർത്തകൾ വിശദമായി

ഉദ്യോഗസ്ഥര്‍ക്ക് മുന്നറിയിപ്പുമായി കോണ്‍ഗ്രസ്


പ്രധാനമന്ത്രി നരേന്ദ്ര മോദിയോട് കൂറു പുലര്‍ത്തുന്ന ഉദ്യോഗസ്ഥര്‍ക്ക് മുന്നറിയിപ്പുമായി കോണ്‍ഗ്രസ്. അത്തരം ഉദ്യോഗസ്ഥരെ നിരീക്ഷിച്ചുവരികയാണെന്നും അവര്‍ക്ക് തിരിച്ചടികള്‍ നേരിടേണ്ടിവരുമെന്നും കോണ്‍ഗ്രസ് നേതാവ് കപില്‍ സിബല്‍ പറഞ്ഞു. റഫാല്‍ ഇടപാടില്‍ കംപ്‌ട്രോളര്‍ ആന്‍ഡ് ഓഡിറ്റര്‍ ജനറല്‍ രാജീവ് മെഹര്‍ഷി മോദി സര്‍ക്കാരിനെ കുറ്റവിമുക്തമാക്കാന്‍ ശ്രമം നടത്തുന്നതായി വ്യക്തമായിട്ടുണ്ടെന്നും അദ്ദേഹം പറഞ്ഞു.


തിരഞ്ഞെടുപ്പുകള്‍ വരികയും പോകുകയും ചെയ്യുമെന്ന് ഉദ്യോഗസ്ഥര്‍ മനസ്സിലാക്കണം. ചിലപ്പോള്‍ ഞങ്ങള്‍ പ്രതിപക്ഷത്തായിരിക്കും ചിലപ്പോള്‍ ഭരണപക്ഷത്തും. പ്രധാനമന്ത്രിയോട് അതിരുകവിഞ്ഞ കൂറും വിധേയത്വവും കാട്ടുന്ന ഉദ്യോഗസ്ഥരെ കൃത്യമായി നിരീക്ഷിക്കുന്നുണ്ട്. മറ്റെന്തിനേക്കാളും ഭരണഘടനയാണ് വലുതെന്ന് അവര്‍ ഓര്‍മിക്കണം കപില്‍ സിബല്‍ പറഞ്ഞു.

റഫാല്‍ ഇടപാട് നടക്കുന്ന കാലത്ത് ഇപ്പോഴത്തെ സിഎജി ആയ രാജീവ് മെഹര്‍ഷി ആയിരുന്നു ഫൈനാന്‍സ് സെക്രട്ടറി. അദ്ദേഹത്തിന്റെ മേല്‍നോട്ടത്തിലാണ് റഫാല്‍ ഇടപാടുകള്‍ മുഴുവന്‍ നടന്നത്. ഇപ്പോള്‍ അദ്ദേഹത്തിന്റെ മേല്‍നോട്ടത്തില്‍ തയ്യാറാക്കുന്ന സിഎജി റിപ്പോര്‍ട്ട് സര്‍ക്കാരിനെ പൂര്‍ണമായും കുറ്റവിമുക്തമാക്കാനാണ് ശ്രമിക്കുകയെന്നും സിബല്‍ ആരോപിച്ചു.താന്‍ ഫൈനാന്‍സ് സെക്രട്ടറിയായിരുന്ന കാലത്ത് നടന്ന ഇടപാടിനെക്കുറിച്ച് എങ്ങനെയാണ് രാജീവ് മെഹര്‍ഷി അന്വേഷണം നടത്തുകയെന്നും കപില്‍ സിബല്‍ ചോദിച്ചു. അഴിമതി നിറഞ്ഞതാണ് റഫാല്‍ ഇടപാട്. ഇതുമായി ബന്ധപ്പെട്ട് ശരിയായ അന്വേഷണം നടക്കണം. തിങ്കളാഴ്ച സമര്‍പ്പിക്കാനിരിക്കുന്ന സിഎജി റിപ്പോര്‍ട്ടില്‍ എന്തൊക്കെയാണുള്ളതെന്ന് സര്‍ക്കാരിന് മുന്‍കൂട്ടി അറിയാമെന്നും അദ്ദേഹം പറഞ്ഞു.










<

JEEVAN TV NEWS

JEEVAN TV NEWS