jeevan news online

വാർത്തകൾ വിശദമായി

കെ.എം.ഷാജിക്ക് നിയമസഭാസമ്മേളനത്തില്‍ പങ്കെടുക്കാമെന്ന് ആവര്‍ത്തിച്ച് സുപ്രീംകോടതി


അഴീക്കോട് എംഎല്‍എ കെ.എം.ഷാജിക്ക് നിയമസഭാസമ്മേളനത്തില്‍ പങ്കെടുക്കാമെന്ന മുന്‍ ഉത്തരവ് ആവര്‍ത്തിച്ച് സുപ്രീംകോടതി. എന്നാല്‍ ശമ്പളം, അനൂകൂല്യങ്ങള്‍ എന്നിവ കൈപ്പറ്റാന്‍ കഴിയില്ല. നിയമസഭാവോട്ടെടുപ്പില്‍ പങ്കെടുക്കാനും സാധിക്കില്ല.

ഹൈക്കോടതി വിധി അടിയന്തരമായി സ്റ്റേ ചെയ്യണമെന്നായിരുന്നു കെ എം ഷാജിയുടെ അഭിഭാഷകന്‍ ആവശ്യപ്പെട്ടത്. അഴീക്കോട് നിയമസഭാമണ്ഡലത്തില്‍നിന്നുള്ള തെരഞ്ഞെടുപ്പ് റദ്ദാക്കിയതിനെതിരെയാണ് കെഎം ഷാജി സുപ്രീകോടതിയിലെത്തിയത് .നേരത്തെ, കഴിഞ്ഞ നവംബറില്‍ ജസ്റ്റിസ് എ കെ സിക്രി അധ്യക്ഷനായ ബെഞ്ചാണ് കെ എം ഷാജിയുടെ നിയമസഭാംഗത്വം റദ്ദ് ചെയ്തുള്ള നടപടിക്ക് ഉപാധികളോടെ സ്റ്റേ അനുവദിച്ചത്. സമ്പൂര്‍ണ സ്റ്റേ വേണമെന്ന ഷാജിയുടെ ആവശ്യം അനുവദിക്കാനാകില്ലെന്ന് അന്ന് കോടതി വ്യക്തമാക്കിയിരുന്നു. 

അതേസമയം, കെ എം ഷാജിയെ അയോഗ്യനാക്കാന്‍ ഇടയായ നോട്ടീസ് പോലീസ് കണ്ടെടുത്തതല്ലെന്ന രേഖകള്‍ പുറത്ത് വന്നിരുന്നു. വളപട്ടണം പൊലീസ് കണ്ണൂര്‍ മജിസ്‌ട്രേറ്റ് കോടതിയില്‍ ഹാജരാക്കിയ റിപ്പോര്‍ട്ടിലാണ് ലഘുലേഖ സിപിഎം നേതാവ് ഹാജരാക്കിയതാണെന്ന വിവരങ്ങളുള്ളത്. കഴിഞ്ഞ നിയമസഭാ തെരഞ്ഞെടുപ്പില്‍ അഴീക്കോട് മണ്ഡലത്തില്‍ വര്‍ഗീയ പ്രചാരണം നടത്തിയെന്നാരോപിച്ച് എതിര്‍സ്ഥാനാര്‍ത്ഥി എം വി നികേഷ് കുമാര്‍ സമര്‍പ്പിച്ച ഹര്‍ജിയിലാണ് ഷാജിക്കെതിരെ നടപടിയുണ്ടായത്.










<

JEEVAN TV NEWS

JEEVAN TV NEWS